Ég er þeirrar skoðunar að börn eigi ekki að hjálpa til við heimilisverkin ... heldur eigi þau að taka þátt í heimilisverkunum.

Ég geri ráð fyrir að nær allir foreldrar séu mér sammála um að eðlilegt sé að börn taki þátt í heimilisverkum eftir því sem þau hafa aldur og þroska til. Verkin snúast ekki eingöngu um að taka til í eigin herbergi heldur einnig um önnur sameiginleg verkefni, svo sem almenna tiltekt, þrif, að setja í og taka úr uppþvottavélinni, fara út í búð o.s.frv.

Í þessu samhengi hef ég oft velt fyrir mér mikilvægi þess að orð og hugsun fari saman. Ef foreldrar telja það eðlilegan hluta af ábyrgð og uppeldi að börn taki þátt í heimilisverkum þá eiga þeir að orða það þannig. Of oft segja foreldrar setningar á borð við:

„Viltu fara út í búð fyrir mig og kaupa mjólk út á morgunkornið og eitthvað sem þú getur haft í nesti í skólann á morgun?“ (Lesist: Fyrir þig).

„Vertu svo búinn að taka úr vélinni fyrir mig áður en ég kem heim.“

„Leggðu nú á borðið fyrir mig meðan ég klára að elda“ (þegar allir eru að fara að borða matinn sem verið er að elda).

Foreldrar sem líta á þessi verkefni sem sameiginleg (líkt og mörg önnur verkefni á heimilinu) eiga að orða það á þann hátt:

„Þú þarft að fara út í búð og kaupa ...“

„Ég vil að þú sért búinn að taka úr vélinni áður en ...“

„Þú leggur svo á borðið meðan ég klára að elda ...“ o.s.frv.

Oft biðja foreldrar um „hjálp“ en pirr ast þegar börnin taka dræmt í það og segja á móti: „Þetta eru ekki bara mín verkefni, við berum öll ábyrgð á þessu.“

Eða: „Ég er ekki þrællinn á heimilinu.“

Og: „Þetta eru sameiginleg verkefni, ekki bara mín.“

Slík orð falla oft í hita leiksins. Ef þú vilt að börnin þín alist upp við að líta á heimilisverkin sem sameiginleg verkefni verður þú að orða hugsun þína í samræmi við það – þannig að þau taki þátt í heimilisverkunum en séu ekki að hjálpa þér.

Hugsaðu gaumgæfilega hvernig þú kemst að orði um þátttöku barnanna þinna í heimilisverkunum. Hafðu að leiðarljósi að setningarnar feli í sér að þér finnist eðlilegt að þau taki þátt í verkefnunum en séu ekki að hjálpa þér.